بابا عزيزي راجل زمني ، يقولو عليه من كبرات الحومة، يثبت حتى على عهد الفرنسيس وشد عليهم المڨرونة ..
وقتلي مات راجل أمي عزيزي مسيكين حب ، على كلام ناس بكري ، يلمني .
بابا عزيزي فخار بكري جيل الصوردي المنقوب وزمان البايات والدايات، وحب يربيني كيما زمان بوعنبة ونسا إلي هوا موش مطول في الدنيا ..
بابا عزيزي تقوى عليه الضرب وهو موش موالف مسيكين .. ما ڨدّش مصروف هالجيل ... قام علي نهار وقالي :
- بنتي راني باش نرهن الدار ...
- ترهن الدار !!!!!!!!!! بابا عزيزي يهديك ، يفضلك .. دارنا موش للبيع ولا للرهنية...
بابا عزيزي زمني ، وكيما الزمنيين الكل ، ما يعرفوا كان الرهنية وما يسمعوا كان بطريق لقباضة..
-بابا عزيزي علاش هكا يفضلك ... هكا الدار تضيع .. تحبني نقعد في الديون سنين ؟؟؟!!! بابا عزيزي الدنيا تطورت ، ورهنية العقارات معاش موضة.. ولله وراسك نجمو نسلكوها من غير ما نضيعو الدار وريحة الاجداد.. بابا عزيزي تسمع فيا ... بربي لا تعملها .. يعيشك حط في عينيك فاش يستنى فيا ...
أنا نصيح ونعيط وبابا عزيزي كيما لكبار الكل يسمعوا كان صوت واحد .. صوتهم ...
صوت يقول : حط الدار في الرهنية .. حط الدار في الرهنية ... الدار في الرهنية ...
الدار باش تضيع وتتحط في الرهنية وبابا عزيزي موش حاس بيا
بربي ... كلموه انتوما .. بالكشي يبدل الثنية ....
No comments:
Post a Comment