التونسي والكرسي

 بربي سامحوني كان باش ندخل في حاجة مش من إختصاصي .. وبربي خذوني على قد عقلي ...

توا عندي قريب الشهرين وانا نسمع في الناس تصيح وتعيط : هذاك يحب  على الكرسي .. هذي لعبت الكراسي وعرك على الكراسي  o.O  

يا جماعة سامحوني أما انا في بالي علاقة التونسي مع الكرسي أهم وأعمق من هاكا برشة.. 

الكرسي راهو عشير التونسي وجريانو عليه مش جديد ... ومش من اليوم زادة .. وكان تسال توا يقوللك ..

توا يقولولك إلي في بلادي الطفل ملي ينوي إنو يقعد (5 أو 6 شهر )  يعملولو "قعاد" :لمة معبية بالصغار .. فيها برشة حلوة وجو .. والسبب إنو بدا يعرف يقعد ويشد الكرسي.. 

وهو مسكين يفرح ويقول: هاهو جو هلكرسي ... انا قاعد ولعباد الكل فرحانة بيا ..

إي.. يكبرشي شوية تبدا امو فالكوجينة وتصيح تقولو : شد بلاصتك !!

وكي يمشي للروضة ، المروضة تقول : أيا شدوا كراسيكم فيسع ..وحتى كي نخرجو للساحة نلعبوا لعبت الكراسي ...

في المكتب والليسي ، ما نشدوش الصف قدام  ألكلاس باش ندخلو اللوالى ونشدوا الكرسي الاول ...

في الكار الصفرة ولا المترو ، الكل  دزني وندزك باش نلقاو كرسي نقعدو فيه ..

حتى كي نخرجو نعملوا قهوة نقعدو 5 سوايع .. القهوة تكمل ونحن مش هاين علينا نقومو ملكرسي ..

في الفطور ، نقعدو حتى بعد منكملو .. خاطر ما نجموش نقومو ونخلو كراسنا فارغة ..

نعرفو إلي الدنيا مع  الواقف  .. أما كتلقا صاحبك قاعد فالمترو، أول كلمة تقولها : حالا معاك صاحبي .. o.O

توا الدنيا مع الواقف ولا حالا مع القاعد !!!

التونسي يعرف إلي الدنيا مع إلي بعيد على الكرسي .. أما علاقة وحبو للكرسي أقوى من هل خرافة .. عندو هو يبيع الدنيا خاطر عشيرو "الكرسي

سامحوني كان طولت ... أما معادش نلومو علي يحبوا الكرسي .. خاطر توا يكرهوا كيف الشعب يبطل يجري على كرسي الكار .. ومعادش يكبش في القعدة عليه بعد الفطور ....