3/27/11

البغية ما نبغيكم والصبر ما نصبر عليكم ..

توا عندي قريب الثلاثة شهور وأنا في الجامعة ندور و ما شفتش طالب دستوري واحد يمشي و يبنبي ويحكم ويتأمر كيما العادة  !!! ياخي فيسع ما نسيتوها صنعتكم ؟؟ ياخي برسمي باش تبداو مناضلين ؟؟؟
لا عاد أمان ما توليوش شغفارا  !!! والله قينتوها علينا !!! يرحم عهدك يا بن علي !! يرحم وقتكم يا ر. س. د !!! علاش هاكا !!! ثلاثة شهور ما فماش صبان صبة ... ثلاثة شهور مافماش تبندير وهزان قفة ... ثلاثة شهور ونحن القلق ظاربنا ... ثلاثة شهور ما سمعناش العنف اللفظي إلي مستانسين تقولوه .. ثلاثة شهور ما وريتوناش وجوهكم الصفرة وانتوما تقاففو وطالعين هابطين على الادارة .. ملخر ثلاثة شهور رجعت الجامعة للطالب مش ليكم..
أما برسمي خسارة !!! إيه نعم خسارة !!! 
تي ما تستغربوش !!! مزعمكم في التبهليل !!! توا نفهمكم علاش خسارة !!! 
 خسارة خاطر كنتو عملينا جو في الفاك ... كنا كي نقلقو نحلو معاكم " حلقة نقاش " باش نضحكو ... كنا ديما نلوجو عليكم باش تطربونا بافكاركم  المسقطة وتفلسيفكم الفارغ ... كنا حتى في إنتخابات المجالس العلمية نعملوا عليكم جو وانتوما تشريو في الأصوات وتزوروا في الصنادق ... كنتم تحسسونا قاداكمش خادامة في الغش والتلوعب  ...
أما بالحق بلاصتكم فارغة .. خاطر حد ما ينجم يعمل إلي كنتو تعملوا فيه !!!   تعرفوا حاجة !!! صدقوني الفاك من غيركم قينيا مش نورمال !!! تي مالقينا على شكون نبرو !!! ملقيناش فنومان كيفكم !!! تي تخاف كان نكملو هاكا ندوروها تنبير على بعضنا ...
تي شبيكم ياخي ... يا ولادي رانا نفدلكو ... يا ولادي ارجعوا خلينا نفركوهم عليكم ... رانا صحيح إلي البغية ما نبغوكم أما زادة الصبر ما نصبرو عليكم ..  

2 comments:

  1. أطلب من فضلك الكتابة بالعربية أو الفرنسية أو
    بالإنقليزية حتى أستطيع أن أعود اليك من حين لآخر و أفهم ما تقولين .
    .... أرجوا المغفرة على صراحتي و الى اللقاء

    ReplyDelete