أنا نحبها أكثر منكم ... أي أكثر منكم !!!
أنا على لقليلة لا نحبها لا إسلامية ولا " تحررية " !!!!
أنا نحبها كيف ما هي !!!
نحبها بالتناقضات إلي فيها مخبية !!!!
نحبها كيف ما هي
نحيبها بالسكارجي الزابراط
إلي مع ترشيقط كعبة شراب يقول
: " بسم الله "
نحبها كيف ما هي
بالباندي متاع الحومة إلي يربرب عليك
خاطرك سبيت ربي في الثنية
بغبار الدشرة إلي يبزنس على البنات الكل
كان على بنت جارتو خالتك بشرة ...
نحبها كيف ما هي
بزطال الحومة إلي يسب في راطسة
الحاكم المشومة ...
أما كيف يتعدى جارهم البوليس يحيه
وبالحضن يسلم عليه ...
أنا نحبها أكثر منكم ...
أي أكثر منكم !!!
أنا على لقليلة لا نحبها لا إسلامية ولا " تحررية " !!!!
أنا نحبها كيف ما هي !!!
نحبها بولد الجيران
إلي كيف نحكي معاه وهو سكران
ومن طفلة لطفلة غرقان
يقلي :
أنا راني ما نعملش الحرام
ولحم الخنزير حرام ...
نحبها بالطفلة إلي من شباك بيتها وهي تكحل ما تتزحزحش
أما كيف يبزنسها واحد والمغرب يذن تقولوا :
ستغفر ربك !!! أذان
نحبها بجملها إلا ما يرى كان حدبتو ....
نحبها بكفارها إلي بالفقر كفروا
نحبها بمسلميها
نحبها بزبراطتها .. نحبها بمدينيها ...
أنا نحبها أكثر منكم ... أي أكثر منكم!!!
أنا على لقليلة لا نحبها لا إسلامية ولا " تحررية " !!!!
أنا نحبها كيف ما هي !!!
أنا نحبها بالتونسي تونسية
No comments:
Post a Comment