لحظة

نص كتب بتاريخ 20 مارس 2014

تقوم كل صباح تمشي ترى مصلحتك ...

تلوج على المترو تلقاه معبي ....

تمشي ترى وجوه تكلت على الخبزة .... كلو يسلت باش ياكل ....

تلقى الوسخ  على الجناب !!! وكان صبت الشتا غادي وين تختم ....

تسمع الكلام ... وتاكل الوجيعة ...

تخمم وتقول : اش عطاتني الخضرا ؟؟؟

هم وغم وغصة ...

اش عملتلي الخضرا 

سكرت البيبان في وجهي وغمتني ....

 تمشي تقهوج وإنت تلعن في النهار إلي خلاو فيه بسبورك أخضر ...

وتقول بالصوت العالي : احنا نموت عليها وهي *** مع الخوانجية .... !!!

تكمل نهارك اكاكا ... يجيك المغرب وإنت تتمشى 

تلقى ساقيك هزتك ليه ...

شامخ ... واقف ... وناصب كتابو في يديه ...

تتلفتلو وتقولوا :

كيفاش مالا : الإنسان مدني بطبعه ... 

ههه ... ما كنتش ترى ياخي ....

يقحرلك ... ويسكت ...

ومن غدي تتفكر الحكاية ...

"تتفكر إلي إنت في شارع "لافيني

تتفكر الفلاقة ...

 تتفكر السلاح ....

ساقية سيدي يوسف والكفاح 

تمشي وإنت تتفكر في دروس التاريخ ....

تنكت المطر ...

مع صوت المغرب والكنسية قدامك ....

التياترو وضو على يمينك ...

البيران بدات تتعبا ...

تلقى روحك قدام الداخلية ...

غصرة توجعك في قلبك 

تتلفت وقدمك المنقالة ،

ويطل عليك ال-TGM

وريحة النوار  هزينها العصافر 

تتبسم وتضحك وتقولها ...

قد ما إنتي خايبة معايا 

قد ما إنت توجع في 

بعيدة عليك أنا نفنى ....

وتروح لدار وتحط راسك بش ترقد ...

تضحك على روحك وتقول ...

مقوى سحرك يا الخضرا

 مقواك ... وما أبهاك يا بلاد عليسة والكاهنة البربرية